ഹർഷ് മന്ദറിന്‍റെ വിക്കിപീഡിയ പേജ് എഡിറ്റ് ചെയ്ത് ഐഎസ് റിക്രൂട്ടർ ആകാൻ ആഗ്രഹിക്കുന്ന ആളാക്കി
പൗരത്വ ഭേദഗതി ബിൽ പാസായാൽ മുസ്ലിം ആയി മാറും എന്നു പ്രഖ്യാപിച്ച സാമൂഹ്യ പ്രവർത്തകൻ ഹർഷ മന്ദർ ഐഎസ് റിക്രൂട്ടറാകാൻ ആഗ്രഹിക്കുന്ന ആളാണെന്ന് അദ്ദേഹത്തിന്റെ വികിപീഡിയ പേജിൽ എഡിറ്റ് ചെയ്തു ചേർത്തു. ഹർഷ് മന്ദർ ഇന്ത്യൻ മുല്ലയും വഹാബി പണ്ഡിതനുമാണെന്ന് ചേർത്ത് അതിന്‍റെ പിന്നാലെയാണ് അദ്ദേഹം ഐഎസ് റിക്രൂട്ടറാകാൻ ആഗ്രഹിക്കുന്ന ആളാണെന്ന് പറഞ്ഞിരിക്കുന്നത്. ‘ന്യൂനപക്ഷവേട്ട പ്രചരിപ്പിക്കാനുള്ള അന്താരാഷ്ട്ര ഇസ്ലാമിക് സമിതിയി’ൽ പ്രവർത്തിക്കുന്ന ആളാണെന്നും ചേർത്തിട്ടുണ്ടായിരുന്നു. 2406:7400:BC:4526:0:0:0:1 എന്ന ഐപി മേൽവിലാസമാണ് ഈ എഡിറ്റ് നടത്തിയിരിക്കുന്നത്. ഇന്നാണ് ഈ എഡിറ്റ് നടന്നത്. മണിക്കൂറുകൾക്കകം ഈ എഡിറ്റ് നീക്കം ചെയ്യപ്പെടുകയും ചെയ്തു. ”ഐഎസ് റിക്രൂട്ടറാകാൻ ആഗ്രഹിക്കുന്ന ആളാണന്നും അദ്ദേഹം ‘ന്യൂനപക്ഷ വേട്ട പ്രചരിപ്പിക്കുന്ന അന്താരാഷ്ട്ര ഇസ്ലാമിക് സമിതി’യിൽ പ്രവർത്തിക്കുന്നു‌വെന്നും ഉള്ള തെറ്റായ വിവരങ്ങൾ ഞാൻ നീക്കം ചെയ്യുന്നു” എന്ന സന്ദേശത്തോടെയാണ് 158.144.42.32 എന്ന ഐപിയിലുള്ള ഉപഭോക്താവ് എഡിറ്റ് നടത്തിയിരിക്കുന്നത്.
പൗരത്വ ഭേദഗതി ബിൽ പാർലമെന്‍റ് പാസാക്കിയാൽ താൻ ഔദ്യോഗികമായി മുസ്ലിം ആവും, പൗരത്വം തെളിയിക്കാനുള്ള ഒരു രേഖയും ഹാജരാക്കില്ല, പൗരത്വ രേഖയില്ലാത്ത ഏത് മുസ്ലിമിനും കിട്ടുന്ന ശിക്ഷ അനുഭവിക്കും, ഈ നിസഹകരണ പ്രസ്ഥാനത്തിൽ പങ്കു ചേരും എന്നാണ് ഹർഷ് മന്ദർ ഡിസംബർ 10 ന് റ്റ്വീറ്റ് ചെയ്തത്. ഇതിന് പിന്നാലെയാണ് വികി വിവരങ്ങളിൽ വംശീയ വിദ്വേഷം നിറഞ്ഞ അടിസ്ഥാനമില്ലാത്ത വിവരങ്ങൾ ചേർക്കപ്പെട്ടത്.
