ഭീകരാക്രമണക്കേസ് പ്രതി പ്ര​ഗ്യാസിം​ഗിന്‍റെ സ്ഥാനാർത്ഥിത്വം റദ്ദാക്കണമെന്നാവശ്യപ്പെട്ട് രാജ്യവ്യാപക ഒപ്പു ശേഖരണം

By on

ഭീകരാക്രമണക്കേസ്  പ്രതി പ്ര​ഗ്യാ സിം​ഗ് താക്കൂറിന്‍റെ പാർലമെന്‍റ് സ്ഥാനാർത്ഥിത്വം റദ്ദാക്കണമെന്നാവശ്യപ്പെട്ട് രാജ്യവ്യാപകമായി ഒപ്പ് ശേഖരണ ക്യാംപെയ്ൻ. ഏപ്രിൽ 17 നാണ് ബിജെപി ഭോപ്പാലിൽ നിന്നുള്ള പാർലമെന്‍റ് സ്ഥാനാർത്ഥിയായി പ്ര​ഗ്യാ സിം​ഗ് താക്കൂറിനെ പ്രഖ്യാപിക്കുന്നത്. രാജ്യത്ത് ആദ്യമായാണ് ഭീകരാക്രമണക്കേസിലെ പ്രതിയെ ഒരു പാർട്ടി പാർലമെന്‍റ് സ്ഥാനാർത്ഥിയായി മത്സരിപ്പിക്കുന്നത് എന്ന് കാട്ടിയാണ് പ്ര​ഗ്യയ്ക്കെതിരായ പരാതി. യുഎപിഎ അടക്കം ചുമത്തപ്പെട്ട് വിചാരണ നേരിടുന്ന പ്ര​ഗ്യ നിലവിൽ ആരോ​ഗ്യ കാരണങ്ങളാലുള്ള ജാമ്യത്തിലാണ് പുറത്ത് കഴിയുന്നത്.

2017 ഏപ്രിലിലാണ് ആരോ​ഗ്യ കാരണങ്ങൾ ചൂണ്ടിക്കാട്ടി പ്ര​ഗ്യാ സിം​ഗിന് ബോംബേ ഹൈക്കോടതി ജാമ്യം അനുവദിച്ചത്. തനിക്ക് സ്തനാര്‍ബുദമാണെന്നായിരുന്നു പ്ര​ഗ്യാ സിം​ഗിന്‍റെ വാദം. എന്നാൽ എന്നാൽ സ്തനാർബുദത്തിന് പ്ര​ഗ്യ ചികിത്സച്ചതായി പിന്നീട് വിവരങ്ങളില്ല എന്നും ഇപ്പോൾ തെരഞ്ഞെടുപ്പിൽ മത്സരിക്കാൻ പ്രാപ്തയാകുന്നത് എങ്ങനെയെന്നും പ്ര​ഗ്യാസിം​ഗിന്‍റെ സ്ഥാനാർത്ഥിത്വം റദ്ദാക്കാനാവശ്യപ്പെടുന്ന പരാതി ചൂണ്ടിക്കാട്ടുന്നു. രാജ്യത്തെ ന്യൂനപക്ഷങ്ങൾക്കെതിരായ യുദ്ധമെന്ന നിലയിൽ ​മുസ്ലിങ്ങൾക്ക് എതിരായി നടന്ന ഭീകരാക്രമണങ്ങളുടെ ആസൂത്രകയായ ഒരാൾക്ക് ബിജെപി സ്ഥാനാർത്ഥിത്വം നൽകുന്നു എന്നത് ആശങ്കാജനകമാണെന്നും പരാതിയിൽ പറയുന്നു. പ്രസിഡന്റ് രാംനാഥ് കോവിന്ദ്, സുപ്രീം കോടതി ചീഫ് ജസ്റ്റിസ് രഞ്ജൻ ​ഗൊ​ഗോയ്, പ്രധാനമന്ത്രി നരേന്ദ്ര മോദി, കോൺ​ഗ്രസ് അധ്യക്ഷൻ രാഹുൽ ​ഗാന്ധി, ദേശീയ ന്യൂനപക്ഷ കാര്യ മന്ത്രി മുഖ്താർ അബ്ബാസ് നഖ്വി, ദേശീയ മനുഷ്യാവകാശ കമ്മീഷൻ എന്നിവർക്കാണ് പരാതി സമർപ്പിച്ചിരിക്കുന്നത്, കലാ സാംസ്കാരിക സാമൂഹിക രം​ഗത്തെ പ്രമുഖരടക്കം രണ്ടായിരത്തോളം ആളുകൾ പരാതിയിൽ ഒപ്പുവച്ച് കഴിഞ്ഞിട്ടുണ്ട്.

പ്ര​ഗ്യാ സിം​ഗിന്‍റെ സ്ഥാനാർത്ഥിത്വം അവർ നായകത്വം വഹിച്ച് നടത്തിയ ഭീകരാക്രമണത്തിന്‍റെ ഇരകളായവരുടെ കുടുംബങ്ങളോടുള്ള അനീതിയാണെന്നും അവർക്കെതിരായ ആക്രമണത്തിന് വഴിയൊരുക്കുന്നതാണെന്നും പ്രസ്താവനയിൽ പറയുന്നു. കലാകാരർ, എഴുത്തുകാർ, മാധ്യമപ്രവർത്തകർ, വിദ്യാർത്ഥികൾ, വിദ്യാഭ്യാസ വി​ദ​ഗ്ധർ തുടങ്ങി വിവിധ മേഖലയിലുള്ളവരാണ് പ്രസ്താവനയോട് ഐക്യദാർഡ്യത്തിൽ‌ ഒപ്പ് വച്ചിരിക്കുന്നത്. സ്ത്രീ സംഘടനയായ ഫിംഗര്‍ റ്റിപ് ഫെമിനിസം ആണ് ക്യാംപെയ്ന്‍ തുടങ്ങിയത്.

PETITION_SIGNATURES_25APRIL_2019

PETITION_COMMENTS


Read More Related Articles