തുർക്കിയിൽ നിരോധിത സംഗീത സംഘത്തിലെ ഗായിക നിരാഹാരം കിടന്ന് മരിച്ചു; ഹെലിൻ ബോലെക് മരിക്കുന്നത് 28ാം വയസിൽ
തുർക്കിയിൽ നിരാഹാരം അനുഷ്ഠിച്ചിരുന്ന നിരോധിത നാടോടി സംഗീത സംഘത്തിലെ അംഗമായ ഗായിക ഹെലിൻ ബോലെക് മരിച്ചു. 28ആം വയസിലാണ് ഹെലിൻ ബോലെക് മരിക്കുന്നത്. നിരാഹരത്തിന്റെ 288 ആം ദിവസമാണ് മരണം. തങ്ങളുടെ സംഘത്തിനോടുള്ള സർക്കാർ നിലപാടിൽ പ്രതിഷേധിച്ച് ജയിലിൽ കഴിയുന്ന കാലത്താണ് ബോലെക് സംഘാംഗമായ ഇബ്രാഹിം ഗോകസെക്കിനൊപ്പം നിരാഹാര സമരം ആരംഭിച്ചത്. ഈസ്താംബൂളിലെ വീട്ടിൽ വച്ചായിരുന്നു അന്ത്യം.
ഗ്രുപ് യോറം എന്ന രാഷ്ട്രീയ സംഗീത സംഘത്തിലെ അംഗമായിരുന്നു ബോലെക്. 2016 മുതൽ തുർക്കി ഗ്രുപ് യോറത്തിന് നിരോധനം ഏർപ്പെടുത്തിയിരിക്കുകയാണ്. പല അംഗങ്ങളെയും എർദഗൻ സർക്കാർ ജയിലിൽ അടച്ചിരുന്നു.
റെവല്യൂഷനറി പീപ്പിൾസ് ലിബറേഷൻ പാർട്ടി ഫ്രണ്ട് എന്ന നിരോധിത സംഘടനയുമായി ബന്ധമുണ്ടെന്ന് ആരോപിച്ചാണ് തുർക്കി സർക്കാർ ഗ്രുപ് യോറത്തിനെ നിരോധിച്ചിരിക്കുന്നത്. ഡി എച് കെ പി / സി എന്നറിയപ്പെടുന്ന ഈ സംഘടനയെ അമേരിക്കയും, യു കെും യൂറോപ്യൻ യൂണിയനും ഭീകര സംഘടനയായി പ്രഖ്യാപിച്ചിരിക്കുകയാണ്. സംഗീതസംഘത്തിനുള്ള നിരോധനം നീക്കുക സർക്കാർ കസ്റ്റഡിയിൽ വച്ചിരിക്കുന്ന സംഘാംഗങ്ങളെ വിട്ടയക്കുക തുടങ്ങിയ ആവശ്യങ്ങളുന്നയിച്ചാണ് ബോലെകും ഇബ്രാഹിം ഗോക്സെകും ജയിലിൽ നിരാഹാരം ആരംഭിച്ചത്. നവംബറിൽ അവരെ വിട്ടയച്ചു. 
ഗ്രുപ് യോറത്തിനെതിരായ കേസുകൾ പിൻവലിക്കുക സംഘത്തെ സംഗീത പരിപാടികൾ അവതരിപ്പിക്കുന്നത് തുടരാൻ അനുവദിക്കുക എന്നതും നിരാഹര സമരത്തിന്റെ അജണ്ടയായിരുന്നു. ഗോക്സെക്കിന്റെ ഭാര്യയടക്കം ഉള്ളവർ ജയിലിൽ തുടരവേ ബോലെകിനെയും ഗോക്സെക്കിനെയും ബലംപ്രയോഗിച്ച് അധികൃതർ മാർക്ക് 11 ന് ആശുപത്രിയിൽ പ്രവേശിപ്പിച്ചു. എന്നാൽ ചികിത്സയ്ക്ക് ഇരുവരും വിസമ്മതിച്ചതോടെ ഒരാഴ്ച കഴിഞ്ഞ് ഡിസ്ചാർജ് ചെയ്തു.
ഇവരുടെ നിരാഹരം അവസാനിപ്പിക്കുന്നതിനായി അങ്കാറ കേന്ദ്രീകരിച്ച് പ്രവർത്തിക്കുന്ന ഒരു മനുഷ്യാവകാശ സംഘടനയുടെ അംഗങ്ങൾ തുർക്കി സഹആഭ്യന്തര മന്ത്രിയുമായി ചർച്ച നടത്തിയിരുന്നു. പ്രതിഷേധം അവസാനിപ്പിക്കാതെ അവരുടെ ആവശ്യങ്ങൾ പരിഗണിക്കാൻ തയ്യാറല്ലെന്ന നിലപാടാണ് സർക്കാർ സ്വീകരിച്ചത്.
