സാമ്പത്തിക സംവരണ നിയമം സ്റ്റേ ചെയ്യില്ലെന്ന് സുപ്രിം കോടതി

സാമ്പത്തികമായി പിന്നോക്കം നിൽക്കുന്ന സവർണ വിഭാ​ഗങ്ങൾക്ക് 10% സാമ്പത്തിക സംവരണം ഏർപ്പെടുത്തുന്ന ഭരണഘടനാ ഭേദ​ഗതി നിയമം സ്റ്റേ ചെയ്യാൻ വിസമ്മതിച്ച് സുപ്രിം കോടതി. ചീഫ് ജസ്റ്റിസ് രഞ്ജൻ ​ഗൊ​ഗോയ്, ജസ്റ്റിസ് ദീപക് ​ഗുപ്ത, ജസ്റ്റിസ് സഞ്ജീവ് ഖന്ന എന്നിവരടങ്ങിയ ബെഞ്ച് കോൺ​ഗ്രസ് നേതാവ് തെഹ്സിൻ പൂനാവാലയുടെ ഹർജി പരി​ഗണിക്കവെയാണ് സാമ്പത്തിക സംവരണ നിയമം സ്റ്റേ ചെയ്യാൻ വിസമ്മതിച്ചത്.

ഇത് രണ്ടാമത്തെ തവണയാണ് സുപ്രിം കോടതി സവർണ സാമ്പത്തിക സംവരണം സ്റ്റേ ചെയ്യാൻ വിസമ്മതിക്കുന്നത്. എം നാ​ഗ​രാജ് വേഴ്സസ് യൂണിയൻ ഓഫ് ഇന്ത്യ കേസ് അടിസ്ഥാനമാക്കി സംവരണത്തിന്റെ പരിധിയായ 50%ത്തിൽ കൂടുതലാണ് സാമ്പത്തിക സംവരണം സൃഷ്ടിക്കുന്ന പുതിയ പരിധി എന്ന് ചൂണ്ടിക്കാട്ടിയായിരുന്നു തെഹ്സിൻ പൂനാവാലയുടെ അഭിഭാഷകൻ വാദിച്ചത്. ഇടക്കാല ആശ്വാസവും തേടി. ഇടക്കാല ആശ്വാസം നൽകാനും കോടതി വിസമ്മതിച്ചു, പകരം സവർണ സാമ്പത്തിക സംവരണത്തിനെതിരായ ഹർജികളെല്ലാം വേ​ഗത്തിൽ പരി​ഗണിക്കുമെന്ന് സുപ്രിം കോടതി അറിയിച്ചു. രാജ്യത്തെ വിവിധ ഹെെക്കോടതികളിലും സവർണ സാമ്പത്തിക സംവരണത്തിനെതിരെ റിട്ട് പെറ്റിഷനുകൾ സമർപ്പിച്ചിട്ടുണ്ട്.