‘അതെ ഇത് തൊപ്പിക്കാരുടെയും ബുർഖക്കാരുടെയും പ്രക്ഷോഭമാണ്, കൂടെ നിൽക്കാൻ നിങ്ങളുണ്ടോ?’ ഇടത് പക്ഷത്തോട് കണ്ണൻ ​ഗോപിനാഥൻ ഐഎഎസ്

By on

പൗരത്വ ഭേദ​ഗതി ബില്ലിനും ദേശീയ പൗരത്വ പട്ടികയ്ക്കുമെതിരായി മുസ്ലിങ്ങൾ നടത്തുന്ന പ്രക്ഷോഭത്തിൽ അണി നിരക്കാൻ ഇടത് പക്ഷവും ലിബറലുകളും തയ്യാറുണ്ടോ എന്ന രാഷ്ട്രീയ പ്രസക്തമായ ചോദ്യം ഉന്നയിച്ച് കശ്മീർ വിഷയത്തിൽ പ്രതിഷേധിച്ച് സിവിൽ സർവീസിൽ നിന്നും രാജിവച്ച ഐഎഎസ് ഉദ്യോ​ഗസ്ഥൻ കണ്ണൻ ​ഗോപിനാഥൻ. മുസ്ലിങ്ങൾ നടത്തുന്ന പ്രക്ഷോഭത്തിൽ മുസ്ലിമല്ലാതെ നിലകൊള്ളാൻ തയ്യാറുണ്ടോ എന്ന് കണ്ണൻ ​ഗോപിനാഥൻ റ്റ്വീറ്റിൽ ചോദിച്ചു. അപ്പോഴാണ് അവരിൽ ഒരാളായി അവർക്കൊപ്പം നിൽക്കുന്നു എന്ന് പറയാനാവുകയുള്ളൂ എന്നും ചോദ്യം വലതുപക്ഷത്തോടല്ല ഇടത് പക്ഷത്തോടാണെന്നും കണ്ണൻ ​ഗോപിനാഥൻ പറയുന്നു.

”അതെ ഇത് തൊപ്പികളുടെയും ബുർഖകളുടെയും പ്രതിഷേധമാണ്! അത് എല്ലായ്പോഴും അങ്ങനെ തന്നെ ആവുമായിരുന്നു. തൊപ്പിക്കാരുടെയും ബുർഖക്കാരുടെയും ആ ആൾക്കൂട്ടത്തിൽ തൊപ്പിയില്ലാത്ത ബുർഖയില്ലാത്ത ആളാവാൻ നിങ്ങൾ തയ്യാറാണോ എന്നതാണ് ചോദ്യം. അതിനെയാണ് അവരിൽ ഒരാളായി അവർക്കൊപ്പം നിൽക്കുക എന്ന് പറയുന്നത്. ആ പരീക്ഷ വലതുപക്ഷത്തിനുള്ളതല്ല. പക്ഷേ ഇടത് പക്ഷത്തിനും ലിബറലുകൾക്കുമുള്ളതാണ്”. കണ്ണന്‍ ഗോപിനാഥന്‍ റ്റ്വീറ്റ് ചെയ്തു.


മുസ്ലിങ്ങളെ വംശീയമായി ലക്ഷ്യം വച്ചുകൊണ്ട് രാജ്യവ്യാപകമായി ബിജെപി സർക്കാർ നടപ്പാക്കാനുദ്ദേശിക്കുന്ന സിഎബിയ്ക്ക് എതിരെ മുംബൈയിൽ പ്രക്ഷോഭം നടത്തിയ കണ്ണൻ ​ഗോപിനാഥനെ പൊലീസ് കഴിഞ്ഞ ദിവസം കസ്റ്റഡിയിലെടുത്ത് വിട്ടയച്ചിരുന്നു. സിഎബിയ്ക്കും എൻ ആർ സിയ്ക്കും എതിരെ തെരുവിലിറങ്ങാനും കണ്ണൻ ​ഗോപിനാഥൻ ആഹ്വാനം ചെയ്തിരുന്നു.


Read More Related Articles