​ഗജ ചുഴലിക്കാറ്റിന് പിന്നാലെ ഭരണകൂട അവ​ഗണനയും; എല്ലാം നഷ്ടപ്പെട്ട് തീരദേശ, കർഷക ജനത

By on

നവംബർ 16 പുലർച്ചെ 1.40 നാണ് ​ഗജ ചുഴലിക്കാറ്റ് തമിഴ്നാട് തീരത്തുകൂടെ കടന്നുപോയത്, നാ​ഗപട്ടണത്തിനും വെടരന്നിയത്തിനും ഇടയിലൂടെ ആയിരുന്നു അത്. നാ​ഗപട്ടണം, തഞ്ചാവൂർ, തിരുവരൂർ, പുതുക്കോട്ടെെ എന്നീ ഡെൽറ്റാ ജില്ലകളിൽ കനത്ത നാശനഷ്ടങ്ങളാണ് ​ഗജ ഉണ്ടാക്കിയത്. ഇന്നലെ രാവിലെ വരെ 45 പേരാണ് കൊല്ലപ്പെട്ടത്. മുഖ്യമന്ത്രിയുടെ ഒാഫീസ് നൽകുന്ന വിവരം അനുസരിച്ച് 1.7 ലക്ഷം മരങ്ങൾ കടപുഴകിയിട്ടുണ്ട്. 735 കന്നുകാലികൾ കൊല്ലപ്പെട്ടിട്ടുണ്ട്. 1.17 ലക്ഷം വീടുകൾ തകർന്നിട്ടുണ്ട്, 88,102 ഹെക്ടർ കൃഷിഭൂമിയെ ​ഗജ ബാധിച്ചിട്ടുണ്ട്.

2.5 ലക്ഷത്തോളം പേരെയാണ് ​ഗജ വീശിയ ജില്ലകളിൽ നിന്ന് സുരക്ഷിത സ്ഥാനങ്ങളിലേക്ക് ഒഴിപ്പിച്ചിട്ടുള്ളത്. ആയിരക്കണക്കിന് ഇലക്ട്രിക് പോസ്റ്റുകൾ തകർന്ന് വീണതിനാൽ ഈ ജില്ലകളിൽ വെെദ്യുതി വിതരണവും തടസ്സപ്പെട്ടിരിക്കുകയാണ്. 2004ൽ നാശം വിതച്ച സുനാമിക്ക് ശേഷമുണ്ടായ വലിയ പ്രകൃതി ദുരന്തമായാണ് ​ഗജ കണക്കാക്കപ്പെടുന്നത്. ഡെൽറ്റ ജില്ലകൾ പ്രധാനമായും കൃഷിയെ ആശ്രയിച്ച് ജീവിക്കുന്നതിനാൽ‍ ഈ ​ഗ്രാമങ്ങളിലെ ജനങ്ങളുടെ ഉപജീവനം പ്രശ്നത്തിലായിരിക്കുകയാണ്.

വിളകൾക്ക് പൂർണനാശം സംഭവിച്ചിട്ടുണ്ട്. തെങ്ങ്, വാഴ, തേക്ക് തുടങ്ങിയവ പൂർണമായും നശിച്ചു. ഈ പ്രതിസന്ധി സൃഷ്ടിച്ച പരിഭ്രാന്തിയിൽ നിന്ന് ജനങ്ങൾ മുക്തരായിട്ടില്ല. അടുത്തുണ്ടായ പ്രകൃതിദുരന്തങ്ങൾ റിപ്പോർട്ട് ചെയ്യുമ്പോഴുണ്ടായിരുന്ന ശ്രദ്ധയും ജാ​ഗ്രതയും ​ഗജ റിപ്പോർട്ട് ചെയ്യാൻ മാധ്യമങ്ങൾ കാണിച്ചിട്ടില്ല. ഇതുവരെയും മുഖ്യമന്ത്രി എടപ്പാടി പളനിസ്വാമി ഈ പ്രദേശങ്ങൾ സന്ദർശിച്ചിട്ടില്ല. ഇതേപ്പറ്റി ചോദിച്ച മാധ്യമങ്ങളോട് മുമ്പേ പ്ലാൻ ചെയ്ത കെട്ടിടത്തിന്റെയും പാലത്തിന്റെയും ഉദ്ഘാടനം അടക്കമുള്ള പരിപാടികളിൽ പങ്കെടുക്കേണ്ടതുണ്ട് എന്നായിരുന്നു മറുപടി.


ഈ പ്രദേശങ്ങളിലെ ​ഗതാ​ഗതം സാരമായി തടസ്സപ്പെട്ടിട്ടുണ്ട്. അവശ്യവസ്തുക്കളുടെ ലഭ്യതയും ഇല്ലാതായിരിക്കുകയാണ്. കടപുഴകിയ മരങ്ങളും തകർന്ന വീടുകളും ബ്ലോക്കായ റോഡുകളും എന്ത് ചെയ്യണം എന്നറിയാതെ കഴിയുകയാണ് ഇവിടെയുള്ള ജനങ്ങൾ.

പരിഭ്രാന്തിയോടൊപ്പം രോഷപ്രകടനങ്ങളും ജനങ്ങളുടെ ഭാ​ഗത്ത് നിന്നും ഉണ്ടാകുന്നുണ്ട്. ​ഗവണ്മെന്റിന്റെ അലംഭാവത്തിനെതിരെ പ്രതിഷേധിച്ച് ജനങ്ങൾ പലയിടങ്ങളിലായി കൂട്ടം ചേ​രുന്നുണ്ട്.

ചുഴലിക്കാറ്റിലുണ്ടായ നാശനഷ്ടങ്ങൾ ശരിയായ രീതിയിൽ റിപ്പോർട്ട് ചെയ്യാത്തതിൽ പ്രതിഷേധിച്ച് ഇന്നലെ സെമ്പോടെെ ​ഗ്രാമത്തിലെ ജനങ്ങൾ ദിനതന്തി പത്രത്തിന്റെ കോപ്പികൾ കത്തിച്ചിരുന്നു.

 


Read More Related Articles